عربىٌ أنا

ملف الانفلونزا فى مصر .... قبل أن نبدأ

0 تعليقات كتب محمد شوشة في 7:34 م

الوقاية خير من العلاج

مبدأ انتبهت له الحكومة المصرية أخيرا وقررت انتهاجه فى ازمة انتشار فيروس انفلونزا H1N1 الذى عرف عالميا باسم مرض انفلونزا الخنازير تعتمد الخطة المصرية على العمل جديا وعلى كل الأصعدة لمنع المرض من دخول مصر نهائيا أو على الأقل تحجيمه فى صورة يمكن السيطره عليها اتخذت الحكومة على هذا الأساس قرارا بتحويل مستشفى الصحة النفسية بمصر الجديدة المعروف باسم مستشفى مصر للطيران الى مقر للحجر الصحى على القادمين لمصر من البلاد التى يشتبه فى احتواءها على الفيروس وفى هذا الاطار تم تحويل المرضى الموجودون اصلا بالمستشفى الذين يعالجون من الادمان الى مستشفى العباسية وتم تسليم المستشفى التابعة لوزارة الطيران من السيد وزير الطيران احمد شفيق الى السيد حاتم الجبلى وزير الصحة يوم الأحد الماضى حدثت خلال هذا التسليم مجموعة من الاحداث لذا سيتم تخصيص حلقة مستقلة لها الخطوة الثانية فى خطة منع دخول الفيروس لمصر كان القرار الذى اتخذ بذبح الخنازير ومنع تربيتها فى مصر وهو ما لاقى عددا من ردود الأفعال كان أهمها ماحدث بمنشية ناصر وسيتم تخصيص عدة حلقات لها لأنها احتوت على عدد كبير من التفاصيل بالاضافة لهذا فان وزارة الصحة أعدت خطة مكثفة لمحاربة المرض او التعامل معه حال تحول الى وباء وهوما اسمته المصرى اليوم الخطة السرية فى عدد الثلاثاء الماضى هذه الخطة سيتم تفصيلها لاحقا انتظروا الحلقة الأولى من الملف قريبا جدا حكاية مستشفى الحجر الصحى وبها تفاصيل حصرية لن تعرفها الا من خلالنا

قصاقيص ورق

0 تعليقات كتب محمد شوشة في 5:40 م

عن السياسة فى مصر المحروسة

الاسلام هو الحل لكن الاسلاميين هم المشكلة

للأسف أصبحت هذه حقيقة ماثلة للجميع ولا مكان لاخفائها فشل تطبيق المشروع الاسلامى فى اكثر من دولة بالعالم ولامجال لحجج واهية حول المحاولات الحثيثة لافشال اى مشروع اسلامى فتركيا احرجت الجميع هل هناك جهود وضغوط وممارسات أقوى من تلك التى تتعرض لها تركيا وهل هناك أزمات اكبر من تلك التى يتعرض لها حزب العدالة التنمية الاسلامى الحاكم؟ ارى ان الاسلام قابل ليكن حلا لمشكلات العالم؟ لكن المشكلة فيمن سيقوم على تطبيقه والحدق يفهم

متقولش الحق

نتيجة صعبة توصلت اليها مؤخرا للأسف والاسف هنا راجع لسببين انى عرفتها وانى اتأخرت فى معرفتها امبارح حسيت ان سواق الاتوبيس بيسرقنا ومش عاوز يطلع تذاكر ولما طلع تذاكر رجعها ناقصة واحد وقال على قد الفلوس المهم واحد نزل ومخدش تذكرة فقطعت تذكرته واحد كبير من السن بس مش محترم فضل يزعق وبيقول انى كان لازم ارجع التذكرة للسواق قلتله وفين الامانة؟ مش دى فلوس ناس فضل يقبح ويعلى صوته طبعا اخوكم مسكتلوش واديتله اللى فيه النصيب يقوم الحمل الوديع يقولى انتا عيب عليك تعامل حد قد ابوك كده رديت قلتله وعيب على واحد قد ابويا يعمل كده وبدأ الجدال فى الاتوبيس النص مؤيد ليا والنص التانى مؤيد للراجل الكبير والكلام كتر بالله عليكوا مش كنت سكت احسنلى؟؟؟

فضل الله

الحمد لله ربنا أكرمنى الاسبوع اللى فات ان شاء الله هسجل برنامج يوم فى الحكم قريب وبتدرب مراسل فى قناة المحور وربنا رزق أخويا بعمر ربنا يخليهولنا يارب بجد الحمد لله وكان فضل الله عليك عظيما

ابريليات مصرية

0 تعليقات كتب محمد شوشة في 2:40 م

بكرة ان شاء الله 6 ابريل

الموعد اللى حددته القوى الوطنية الفيس بوكيه المصرية

موعد للاضراب العام للشعب المصرى

اولا لم ولن أحدد موقفى من الاضراب أو بمعنى أدق مش هاعلنه

لسبب بسيط أوى ان عندى بكره التزامات مهمة جدا تتمثل فى موعد مع شخصية هامة لو تم بنجاح هيغير من شكل

مستقبلى لو ربناء شاء

وكمان الاعداد لحفلة افتاح اسرة عالمية فى الكلية عندنا لأن بصراحة البت مرة صعبانة عليا أوى ومش هينفع اسيبها

لوحدها ... البت قربت تختفى

هتسألونى مروة مين دى هقولكم دى مقررة اسرة عالمية اللى حفلة افتتاحها يوم الثلاثاء ان شاء الله 7 ابريل

نرجع بقى لحوار 6 ابريل دا زى ما العبد لله شايفه

حلقة جديدة من حلقات التنشنة المستمرة بين الأمن والنشطاء السياسيين غير المنتمين للحزب الوطنى

اعتقالات مستمرة من كام يوم لنشطاء حركة 6 ابريل

وتصعيد من الشباب المشتركين فى الحركة وتهديد بتوسيع دائرة الاحتجاجات

وصور يا تليفزيون واكتبى يا صحافة شعار جامد طحن اختاره الشباب اللى بينظموا الاضراب لليوم دا

حقنا وهناخده

وكمان تطور طبيعى انهم حددوا أربع مطالب اساسية لليوم دا

وحددوا كمان شكل التحركات وأماكنها وقياداتها وتفاصيلها

وظهروا السنادى منظمين بطريقة كبيرة أكتر من اضرابى العام الماضى

واصبحوا اكتر ميلا للاستغناء عن مساندة الاحزاب والقوى السياسية المعارضة

يعنى بقى موقفهم باختصار:

عاوز تشارك معانا اهلا سهلا بيك ونورت المحكمة

مش عاوز يبقى فى ستين ألف داهية أو سلامة مش فارقة والباب يفوت فيل وزرافة متلبسين مش جمل وبس

وزاد كمان من فرصتهم ان الفيس بوك انتشر خلال السنة اللى فاتت من ساعة الاضراب لحد دلوقت زيادة غير عادية

يعنى الشباب المصرى اللى لسه بيتعرفوا جديد قبل ما يسأل صاحبه تليفونك كام أو ايميلك ايه؟

بيسأله الاكونت بتاعك ع الفيس اسمه ايه؟

ودا انعكس على انتشار الحركة وافكارها بين الشباب المصرى

كمان الشباب اللى كان لسه بيستهجى ألف باء سياسة فى 6 ابريل 2008

كبر واتمرس وبقى استاذ واتمرمط على سلالم مصر من اسكندرية لأسوان

من سلالم نقابة الصحفين للمحامين لنادى القضاة لجامعة القاهرة لعين شمس لمجلس الدولة لمعهد بنها للنوبة وغيرها

وغيرها

واهتمام الاعلام بيهم زاد أوى ما انتوا عارفين الاعلام المصرى السنة اللى فاتت توقعوا انهم شوية عيال مش هيأثروا

لكن لما الاضراب السنة اللى فاتت ظهر ع السطح يبقى لازم نهتم السنادى وظهرت التغطيات الاعلامية المتتالية

والشروق عملت ملف من يوم الجمعة والمصرى اليوم والحور ودريم ويلا موسم اعلامى ميتعوضش

باختصار وبعد الرغى اللى فات دا كله شايف ان الاضراب وعلى عكس ما كتير ممكن يفتكروا هيبقى شديد وجامد وش

وهيلاقى استجابة مش أقل من السنة اللى فاتت

بس السؤال اللى لازم يقب ع الساحة ناو:

هنستفاد ايه من الاضراب؟؟

هل فعلا الاضراب هيجيبلنا حقنا؟؟

بصراحة مش متفائل

هتسألنى ليه اليوم الاسود اللى انتا رسمتهلنا دا ياعمنا من أولها

أقولك يا حاج:

أولا: النظام بتاعنا المفروض نفهم انه مش هييجى بلوى الدراع .. بس مفيش مشكبلة نستخدم طرق سلمية للضغط زى

الاضراب شرط انه يكون سلمى ومؤدب ومتربى ومياكلش من طبق حد غير طبقه

ثانيا : الاستجابة الشعبية مهما كانت جامدة فبتفضل فى النهاية سلبية يعنى كل واحد آخره انه يقعد فى بيته على جنب

ولو البليه لعبت معاه وكان وطنى بقى وعمل شجيع السيما هيفتح الجزيرة يتفرج ع الناس اللى هتتسحل فى شوارع

مصر وميادينها ويلعن ويسب فى سره طبعا علشان الحيطان لها ودان

فيه اسباب تانية كتير بس خلينا فى دول يا ريسنا نركز فيهم شوية

علشان الاسباب دى ياعم العبد لله شاف ان الحل فى المبادرة الشعبية المصرية ... كلمة سواء

لعلها تكون الحل ويوضع سره فى اضعف خلقه

لو شايف ان المبادرة دى ممكن تعمل حاجة عندك الجروب ع الفيس

اعرف التفاصيل واشترك معانا

يمكن !!

المبادرة الشعبية المصرية ... كلمة سواء

0 تعليقات كتب محمد شوشة في 1:07 م

مصرى من 80 مليون بحب بلدى ونفسى أشوفها جنة

حزين جدا لحالة الاستقطاب والاستعداء المسيطرة على وقعنا السياسى والاجتماعى

أحزابنا وجماعاتنا وقوانا السياسية يجب أن تتعالى على مصالحها الضيقة الى مصلحة الوطن الذى يجمعنا

هذه دعوة للمصالحة الوطنية العليا

دعوة الى فخامة الرئيس مبارك رئيس كل المصريين

وحكومته التى جمعت القوى والفصائل والتنظيمات الفلسطينية فى حوار شامل

ان كنت ترى يا سيادة الرئيس انه من الممكن جمع فتح وحماس على طاولة واحدة ..

فأنا ارى ان الجمع بين القوى السياسية المصرية أولى وأسهل

دعوة الى قادة الاحزاب المصرية من اقصى اليمين الى اقصى اليسار

اتخنقنا من احوالنا الحزبية المصرية وندعو سيادتكم للنظر فيها وايجاد حلول عاجلة

دعوة الى فضيلة المرشد العام للاخوان المسلمين

الحزب الوطنى مصرى وليس رجسا من عمل الشيطان

تنازلات من فضيلتكم ومن الجماعة لاتخل للمبادئ لكنها تصب فى مصلحة الوطن الذى نحبه مطلوبة الآن أكثر من أى وقت مضى

دعوة الى الحركات الرافضة للنظام

هدنة قصيرة لترتيب الاوضاع والصلح العام أصبحت لازمة لحل المشاكل المتراكمة

دعوة الى الشعب المصرى

طالب بحقك فى قيادات سياسية واعية تسعى لمصلحتك أولا وأخيرا

دعوة الى الاعلام الذى أشرف أن أكون مجرد عضو صغير فى اسرته

ساعدوا المجتمع على مواجهة أزمته وحل مشكلاته المستعصية عبر حوار جاد وبناء

اتركوا النقد للنقد ولنبدأ العمل على بركة الله لنجعل مصر الكنانة جنة الله على أرضه

اتفقوا يرحمكم الله وتعالوا الى كلمة سواء

حوار ولكن !!!

0 تعليقات كتب محمد شوشة في 8:31 م

بدأت لجان الحوار الوطنى الفلسطينى أعمالها فى القاهرة عبر خمس لجان ولجنة متابعة عليا ومثلت كل الفصائل فى فعاليات هذه اللجان لكن السؤال الأبرز هو هل ينجح الحوار؟؟ ابدو متشائما كثيرا فى هذا الاطار فتح بوضعها الحالى وبكوادرها الحاليين غير جادين فى بدء أى حوار هم فقط يحاولون التخلص من الضغوط العربية المكثفة عليهم يحاولون أن يظهروا حماس بمظهر الانقلابى الذى لا يرغب فى بدء أى حوار الحالة الوحيدة التى ستغير الأوضاع أن يسير أحد الطرفين فى اتجاه معاكس ليعود الى الآخر اما ان تعود فتح الى خانة الحرية والكرامة والمقاومة أو أن تتخلى حماس عن ثوابتها وشعبها وتلقى بآمال شعبها وأمتها وتتخلى عن الأسرى واللاجئين وتترك القدس لليهود يعيثون فيها كيفما شاءوا وكلتا الحركتين بوضعهما الحالى لايرضيان بطريق الآخر فلا فتح ستنصلح ولا حماس سترضخ وحتى ان تم التوصل لاتفاقية هشة فسيكون مصيرها الى زوال تماما كمصير القاهرة 2005 ومكة وصنعاء ويبقى الحسم العسكرى هو الحل القائم القادم للضفة من القطاع أو للقطاع من الضفة

التصويت النهائى فى راديو حريتنا

0 تعليقات كتب محمد شوشة في 1:42 م

السلام عليكم جميعا

السباق النهائى على الفوز

ببرنامج سنة أولى هوا على راديو حريتنا ابتدا

وزى ما انتوا عارفين انا مشارك فى المسابقة وبرنامجى يوم فى الحكم والفوز بالبرنامج بيكون بالتصويت يعنى تختار من بين 12 فكرة على موقع الاذاعة على النت http://www.horytna.net/ يلا بسرعة ادخلو صوتوا لفكرة يوم فى الحكم ولو عاوزين تسمعوا الحلقة دا اللينك بتاعها http://www.horytna.net/Articles/Details.aspx?TID=1&ZID=261&AID=9922 وكمان ممكن تكتب رأيك فى البرنامج كله أو فى فكرة يوم فى الحكم أو فى الافكار التانية على الرابط اللى تحت ده http://www.horytna.net/Articles/Details.aspx?TID=1&ZID=261&AID=12751 هتلاقوا التصويت موجود على يمين الموقع وفكرة يوم فى الحكم أول فكرة متنسوش ومتتأخروش تحياتى محمد شوشة